Быйыл саха литературатын төрүттээччилэриттэн биирдэстэрэ, поэт, прозаик, драматург, бөдөҥ общественнай деятель, норуот олус таптыыр, ытыктыыр, сүгүрүйэр суруйааччыта Анемподист Ивнович Софронов-Алампа төрөөбүтэ 120 сыла. Саха литературатын, култууратын, ускуустубатын сайыннарыыга сүҥкэн кылааты хаалларбыт, Талыы-талба Тааттаттан төрүттээх улуу суруйааччыбыт буолар.
Онон сиэттэрэн, Н.Д. Неустроев аатынан Дьокуускай куорат киин бибилэтиэкэтигэр «Алаас уола Алампа» диэн суруйааччы олоҕор уонна айар үлэтигэр аналлаах уруок ыытылынна. Уруокка Айыы Кыһатын 5 «в» кылааһын үөрэнээччилэрэ кытыннылар, кылаас салайааччыта саха тылын уонна литературатын учуутала Липатова Светлана Афанасьевна. Библиотеканы кытта бииргэ үлэлээһини Айыы Кыһатын педагог-библиотекара Кривошапкина Дария Алексеевна салайар.
Уруокка Алампа Соппуруонап хантан төрүттээҕин, олус ыарахан олохтон киһи буолан тахсыбытын, айар үлэтигэр бастакы хардыыларын хоһоон, кэпсээн суруйуутуттан саҕалаабытын, бастакы драматын ханна суруйбутун туһунан кэпсэттибит. Суруйааччы кэргэнигэр Дуунньаҕа-Евдокия Яковлеваҕа анаабыт ырыа буолбут хоһоонун «Үрүҥ туллук мөлбөстүүрү» ыллаан иһитиннэрдим. Сайылыгар «Куобах буһарбыт» алааһыгар анаабыт хоһоонун бары дорҕоонноохтук аахтыбыт. Уруок ылбыт билиини чиҥэтэр викторинан түмүктэннэ, бэрт сэргэх уруок буолан ааста.
