Муус устар 18 күнүгэр Н.Д. Неустроев аатынан SMART-библиотека былаанынан саха норуодунай суруйааччыта, ССРС суруйааччыларын Сойууһун чилиэнэ, Аҕа дойду Улуу сэриитин кыттыылааҕа, Саха АССР П.А. Ойуунускай аатынан Государственнай бириэмийэтин лауреата Соловьев Василий Сергеевич - Болот Боотур төрөөбүтэ 110 сылыгар аналлаах, Ф.И. Авдеева аатынан Оҕо айымньытын дыбарыаһын алын сүһүөх оскуолатын 2 «а» кылааһын үөрэнээччилэригэр «Ол күнтэн – бу күҥҥэ» диэн бибилэтиэкэ уруога буолла.
Суруйааччы аатын иһиттэхпитинэ тута саха литературатын дириҥ ис хоһоонноох үс чаастан турар «Уһуктуу» романа, көс эбээннэр олохторун-дьаһахтарын бастакынан көрдөрбүт «Сааскы дьыбардар» айымньыта көстөллөр. Кини айар үлэтин поэзияттан саҕалаабыта. Оҕолорго анаан чабырҕахтары, үгэлэри, хоһооннору, остуоруйалары суруйбута.
Уруокка оҕолор суруйааччы олоҕун уонна айар үлэтин кытта билистилэр. Оҕолорго анаан таһаарбыт «Куобахчаан», «Хомурахтаах хоту сирим оҕолоругар» кинигэлэрин көрдүлэр. Тайҕа кыылларыгар сыһыаннаах «Таабырын хоһооннор» кинигэттэн таабырын таайа оонньоотулар, бэйэлэрэ көрбүт кыылларын кэпсээтилэр, уолаттар бөрө суолун көрбүттэрин уруһуйдаатылар. Элбэххэ үөрэтэр «Киһиргиибин диэн кирсэ быстыбыт» остуоруйа ойуу-кинигэтин аахтылар. Бу ойуу-кинигэни Дьокуускай куорат 1-гы №-дээх орто оскуолатын үөрэнээччитэ Алина Бурнашева уруһуйдааабыт ойууларыттан оҥоһуллубут. Оҕолор остуоруйаны олус сэргээтилэр. Сүрүн герой аҥыр барахсаны көтөрдөр бары кинини көмөлөөбүттэрин аһыннылар. Бу остуоруйа киһини мээнэ киһиргээбэт, сымыйа сураҕы тарҕаппат буоларга үөрэтэрин эттилэр.
Онон, бөдөҥ прозаик Соловьев Василий Сергеевич-Болот Боотур туһунан бэрт сэргэх уруок буолан ааста. Өссө да инникитин маннык хабааннаахтык библиотека - оскуола - учуутал буолан бииргэ үлэлэһиэхпит.
