Өй-санаа күүһүн түмэр «Квантовай эмтэнии кистэлэҥнэрэ» түһүлгэтэ буолан ааста
Олунньу 7 күнүгэр В. Г. Белинскэй аатынан Кыраайы үөрэтэр бибилэтиэкэҕэ «Квантовай эмтэнии кистэлэҥнэрэ» диэн ааттаах дьоһун тэрээһин үрдүк таһымнаахтык ыытылынна. Ааҕар саала үтүөнү көрөргө-истэргэ бэлэм, билиигэ тардыһар дьонунан тоҕуоруһа муһунна. Бу көрсүһүү дьон бэйэ-бэйэни өйдөһөрүгэр, саҥа билиини үөрэтэригэр, киһи сыһыанын сүрүннүүргэ уонна чэгиэн туругу тупсарарга анаммыта.
Тэрээһин кэмигэр билими уонна саха төрүт үөрэҕин ситимниир, олус кэрэхсэбиллээх тиэмэлэри кытта билсистилэр:
«Квантовай ыстаныы (скачок) диэн тугуй?» диэн дириҥ ыйытыыга хоруй туттулар.
Сахаҕа сүдү киһи, учуонай Василий Иванович Оконешников квантовай медицинаны төрүттээччи үөрэҕэ сиһилии кэпсэннэ.
Дмитрий Иванович Менделеев таблицатынан эмтэнии ньымаларын туһунан толору билиһиннэрии буолла.
Бу бэлиэ тэрээһини ытыктабыллаах ыалдьыттарбыт кэлэн сырдаттылар уонна сыаналаах сүбэлэрин биэрдилэр:
Аргунова Любовь Семеновна — дьиэ кэргэн педагога, биһиги эйгэбитигэр уонна айылҕаҕа буола турар уларыйыылары, киһи олоҕор дьайыыларын туһунан киэҥник кэпсээтэ.
Софронова Татьяна Софроновна – Майынчы — саха эмчитэ, Василий Иванович Оконешников утумнааччыта, кини үөрэҕин тарҕатааччы, квантовай эмтэнии кистэлэҥнэрин дириҥник арыйда. Ордук чуолаан Василий Иванович үөрэҕинэн Аан дойду мадьыалын хайдах өйдүүрүн, ыарыылары хайдах быһаарарын, көстөр уонна көстүбэт эйгэлэр киһиэхэ хайдах дьайалларын уонна новемологическай таблицаны ааҕан чөл, чэгиэн туруктаах буолар ньымалары сырдатта. Бэл диэтэр, саха өс хоһоонноругар элбэх кистэлэҥ, күлүүс тыллар баалларын билиһиннэрдэ, дьон сэҥээриитин ылла.
Урут В.И.Оконешниковы кытта сирэй билэр, кинини кытта алтыспыт дьон кэпсээнинэн ситэриллибитэ дьон болҕомтотун тарта.
Көрсүһүүгэ кэлбит эрэ барыта өй-санаа кистэлэҥнэрин арыйан, инники олохторугар туһалаах билиини ылан, олус дуоһуйан тарҕастылар. Бу түмсүү дьоҥҥо чэгиэн туругу уонна чөл олоҕу тутуһарга саҥа күүһү, эрчими биэрдэ.
