Сэтинньи 25 күнүгэр В.Г. Белинскэй аатынан Кыраайы үөрэтэр бибилэтиэкэ Өрөспүүбүлүкэтээҕи Олоҥхо декадатын чэрчитинэн ийэ тыл барҕа баайын иҥэриммит сүдү айымньы тылын-өһүн иҥэрэр, билиини чиҥэтэр, итиэннэ сахалыы таба суруйар таһымы үрдэтэр сыаллаах үгэскэ кубулуйбут «Олоҥхо дьыктаана» аахсыйаҕа кытынна.
Быйыл дьыктаан Мэҥэ Хаҥалас улууһун Тараҕай нэһилиэгин биллиилээх олоҥхоһута, норуот ырыаһыта, сэһэнньит, остуоруйаһыт ССРС суруйааччыларын союһун чилиэнэ Иннокентий Иванович Бурнашев-Тоҥ Суорун «Сылгы Уола Дыырай бухатыыр» олоҥхоттон сир ийэ дойду айыллыытын туһунан быһа тардыыны суруйдулар. Барыта 32 киһи кытынна, олортон 19 эдэр ыччат.
Дьыктаан кыттааччылара бибилэтиэкэ үлэһиттэрин көҕүлээһиннэринэн тэриллибит коллекционер Сергей Осипов «Дьулуруйар Ньургун Боотур» олоҥхо араас тылынан тахсыбыт кинигэлэрин, сэдэх матырыйаалларын көрдөрөр «Өбүгэ тыыннаах тыла» диэн быыстапкатын сэҥээрдилэр, ону таһынан сахалыы тыл оонньуутугар кыттан бэйэлэрин тургутан көрдүлэр, саҥа сахалыы солбуйар тылларынан билиилэрин хаҥаттылар.
Сылын ахсын ыытыллар аахсыйаҕа дьыктааны суруйааччылар элбии тураллара, ордук эдэр ыччат кэлэн суруйара кэрэхсэбиллээх.
Дьыктааны суруйбут Дьокуускайдааҕы коммунально-строительнай техникум үөрэх кыһатын кураторыгар Третьякова Марианна Николаевнаҕа, устудьуоннарга, көхтөөх ааҕааччыларбытыгар махталбытын тиэрдэбит!
