Кыраайы үөрэтэр В.Г. Белинскэй аатынан бибилэтиэкэҕэ Айылҕаттан айдарыылаах айар Айылгылаах Саха култууратын үтүөлээх үлэһитэ, уйулҕаһыт, алгысчыт, бибилэтиэкэр идэлээх Тайаана Афанасьевна Никифорова кинигэлэрин, кумааҕыттан кырыйыыларын, сиэр-туом тула кэпсэтиигэ ахсынньы аам-даам тымныытын аахсыбакка дьон-сэргэ муһунна.
Тайаана кинигэлэриттэн чорботон төрөппүттэрин туһунан ахтыы кинигэтигэр тохтоон: «Өбүгэлэрбит туһунан кинигэ оҥорон, ыччаттарбытыгар хаалларыы - биһиги көлүөнэни ситимниир иэспит». - диэн бэлиэтээтэ. Оҕолорго, учууталларга, кырыйыан баҕалаахтарга анаан хас да кинигэ, методическай пособиелары таһааттарбыта. Кинигэлэр ис хоһоонноро олус интэриэһинэй уонна иитэр-үөрэтэр аналлаахтар. Бу кинигэлэр Тайаана бибилэтиэкэр уонна уһуйааччы-маастар буолан үлэлээбит үлэтин түмүктэрэ.
1996-2014 сылларга Тайаана Афанасьевна туһунан уонна кини ыстатыйаларын хомуйан, Дьокуускайдааҕы библиотечнай ситим библиографтара Татьяна Купоросова, Мария Иванова оҥорон таһаарбыт дайджестарын көрсүһүү кыттааччылара сэргээн көрдүлэр.
Ыалдьыппыт мустубут дьоҥҥо оҕону иитии, алгыстар тустарынан, олоххо көрүүлэрин, ыраастаныы, атын дойдуларга дьикти дьарыктаах дьон туһунан анаарда, сэһэргээтэ. Ону таһынан киһи олоҕор буолар араас түгэннэртэн быыһыыр харысхалларын, алгыстаах оҥоһуктарын кэпсээтэ, көрдөрдө. Сиэр-туом боппуруостарыгар эппиэттээтэ.
Ааҕааччы Дария Григорьевна Бугаева: «Чугас киһим ыарахан кэмигэр Тайаана алгыһа тиийэн, билигин дьоллоохтук олорор, алгыһын истиэнэҕэ билиҥҥэ дылы ыйаан туруорар», - диэн махталын тиэрдибитинэн үгүһү толкуйдатар, билиибитин үксэтэр көрсүһүүбүт түмүктэннэ.
