Билиҥҥи кэммит биир саамай ааҕыллар кэпсээнньитин, драматурун, тыабыт сирин олоҕун-дьаһаҕын, дьонун-сэргэтин бэрт чугастык-истиҥник сэһэргиир айымньылардаах саха норуодунай суруйааччыта Дмитрий Федосеевич Наумов ааҕааччылары кытта көрсүһүүтэ бэрт истиҥник, сэргэхтик ааста.
Суруйааччы тыа сирин, кини дьонун, айар үлэтин, айымньыларын, саха историятын, биллиилээх дьонун туһунан киэҥник анаарда, сэһэргээтэ. Тыа сирэ – саха омугун уйата буоларын, ханнык да кэмҥэ дэриэбинэтин,кини дьонун-сэргэтин таптыырын, ытыгылыырын, ол тапталын өрүү дууһатыгар, сүрэҕэр илдьэ сылдьарын тоһоҕолоон бэлиэтээтэ.
Ону таһынан ыалдьыппыт Сталин туһунан коллекциятыттан аҕыйах тиражтаах, бэрт сэдэх кинигэлэрин көрдөрдө, билиһиннэрдэ.
Библиотекабытыгар суох уонна элбэхтик ааҕыллан эргэрбит кинигэлэрин оннугар саҥа кинигэлэрин, кэпсээннэрдээх аудио-диискэлэрин бэлэх уунна.
Ааҕааччыларбыт Дмитрий Федосеевич кинигэлэрин илии баттатан ылан, санаа атастаһан, астынан тарҕастылар.
«Дьоро, олохпор биир өйдөбүнньүк көрсүһүү иһин махтал! Бэрт эриэхимэй сэьэннээх-сэппэннээх, бэртээхэй айымньылардаах, чахчы да норуот суруйааччытын кытта ыкса билсии, бириэмэни билбэккэ сэьэргэһии буолла», - ааҕааччы Татьяна Карпова санаатын эттэ.
