Хас биирдии саха киһитэ дэгиттэр талааннаах дииллэр, хас биирдии үйэ, кэм кэрдиис айылҕаттан бэриллибит сүдү күүстээх, айдарыылаах киһилээх буолар. Кинилэртэн биирдэстэрэ – Борис Федорович Неустроев - Мандар Уус Саха Ѳрѳспүүбүлүкэтин бочуоттаах гражданина, Духуобунай академиятын академига, П.А.Ойуунускай аатынан Государственнай Бириэмийэ лауреата, норуот маастара, тимир ууһа, ойууһут, айанньыт, бѳлүһүѳк, уһуйааччы. Киэн Саха сирин улуустарын барытын кэрийбит диэтэхпитинэ сыыспаппыт буолуо. Умнулла быьыытыйбыт тѳрүт дьарыкпытыгар үүнэр кѳлүѳнэни иитии- такайыы – бүгүҥҥү күн ирдэбилэ. Оҕо аймах, ыччат оскуолаҕа, үлэ уруоктарыгар, куруһуоктарга уһаналлар. Уустар түѳлбэлэринэн аатырбыт Таатта Баайаҕатыгар «Айылгы, айымньы киинэ» Мандар кыһата 2007 сыллаахха тэриллибитэ. Манна Мандар Уус салалтатынан, дьоҕурдаах ыччат саха былыргы уустарын кистэлэҥнэригэр уһуйуллаллар.
Быйыл күһүн алтынньы ый 20 күнүгэр Борис Федорович Неустроев – Мандар Уус тѳрѳѳбүтэ 80 сыла.
Мандар Уус Таатта улууһун Баайаҕатыгар күн сирин кѳрбүтэ. Кыра эрдэҕиттэн айылҕаны кытта ыкса ситимнээх, айылҕаттан айдарыылаах, дэгиттэр талааннаах буолан оҕолортон уратыта тута биллэр этэ. Кини оскуола сааһыттан соҕотоҕун тыаҕа мээнэ, бэйдиэ барар идэлээх эбит, ол сылдьан кыылы-сүѳлү кытта алтыьан, үѳрэтэрэ, айылҕа дьикти кэрэ кѳстүүлэрин уруһуйдаан, ѳйүгэр хатаан улааппыта.
Тѳрѳѳбүт дойдутун Баайаҕатын сирин-уотун үѳрэтэн, киэҥ нэлэмэн Сахабыт элбэх улуустарын, ѳбүгэлэрбит олорон ааспыт алаастарын кэрийэн, иһитин – хомуоһун оһуордарын, сэргэлэрин ойууларын барытын кѳрѳн үѳрэтэн, уруһуйдаан кинигэлэргэ тиһэн эдэр кѳлүѳнэ ыччаттарбытыгар бэлэҕэ үгүс. Борис Федорович тимир ууһа – уһанар дьиэтэ, кыһата ѳрүү кэлэр ыалдьыкка аана аһаҕас дииллэр түүннэри-күннэри, тѳһѳлѳѳх элбэх Сахабыт сирин уустара киниэхэ үѳрэнэн, уһаарыллан тимир уустара буолбуттара буолуой, киһи ааҕан сиппэт. Ол курдук кини сайын аайы оскуола эҥэр оҕолорго анаан лааҕыр арыйан уус идэтигэр такайар, үѳрэтэр, уһуйар.
Уол оҕо улаатыытыгар сүдү улахан оруоллаах дии саныыбыт, ол курдук мин кыра уолум Айсен Борис Федорович лааҕырыгар сылдьан бэйэтигэр саха быһаҕын охсон оҥорон үѳрүүтэ муҥура суох. Ол сылдьан кини быыстала суох дойдутун , олоҕун мүччүргэннээх сырыыларын туһунан кэпсээн, улаатан эрэр оҕолорго ийэ дойдуларыгар тапталлаахтык сыһыаннаһалларыгар олук уурар. Оҕо лааҕырга сылдьан үлэҕэ сыстаҕас буоларга үѳрэнэр, айылҕаҕа харыстабыллаахтык сыһыаннаһа үѳрэнэр, ѳбүгэлэрбит хайдахтаах курдук тыйыс айылҕаҕа олорбут олохторун туһунан кэпсээн дойдуга тапталы иҥэрэр дьикти күүстээх. Уолум билигин улахан киһи, лааҕырга сылдьан ылбыт билиитэ, сатабыла инники олоҕор сүҥкэн улахан оруоллаах диэн саарбаҕалаабаппын, оҕом сахалыы ыраастык саҥарар, ийэ дойдутугар бэриниилээх киһи буолуо диэн эрэнэбин. Дьиэ кэргэним Мандар Ууһу – Борис Федорович Неустроевы убаастыыбыт, кини сүдү талааныгар сүгүрүйэбит, 100 сылга биирдэ тѳрѳѳн ааһар Сахабыт сирэ киэн туттар ытык тумус киһитин үбүлүѳйдээх сылынан итиитик-истиҥник эҕэрдэлиибит.
