1963 сыл алтынньы 8 күнүгэр Киин ханаалга аан бастакы көрдөрүү тахсыбытынан Саха телевидениетын күнэ бэлиэтэнэр.
Онон сиэттэрэн, Н.Д. Неустроев аатынан Дьокуускай куорат киин библиотекатыгар НКИХ «Саҥа күн» сарсыардааҥҥы биэрии уонна «Тэтим» саха араадьыйатын ыытааччыта, СР суруналыыстарын союһун чилиэнэ, «СР Ыччат политикатын туйгуна» – Ньургуйаана Ботуеваны кытта истиҥ көрсүһүү, сэргэх кэпсэтии буолла.
Ньургуйаанатэкраҥҥа саҥара үөрүйэх киһи быһыытынан бэрт холкутук микрофонун тутан оҕо сааһыттан, оскуолаҕа үөрэммит сылларыттан, устудьуоннаабыт кэмнэриттэн быһа тардан умсугутуулаахтык кэпсээнин саҕалаата.
Эрдэттэн бэлэмнээбит ыйытыыларбар тута хоруйдаан, ыытааччы үлэтин, араадьыйа уонна күөх экраҥҥа үлэлиир уратытын, эфирдэри оҥоруу элбэх киһи, хамаанда үлэтиттэн тахсарын, куруутун дьон ортотугар сылдьар буолан бэйэҕин көрүнэ, бары өттүнэн үүнэ-сайда сылдьарын туһунан олус интэриэһинэйдик кэпсээтэ.
Куоракка бастаан устудьуоннуу сылдьыбыт кэмнэрин санаан-ахтан ылла: М.К. Аммосов аатынан ХИФУ Хотугулуу-Илиҥҥи норуоттар тылларын уонна култуураларын үөрэтэр институтка үһүс куурска үөрэнэ кэлбит. Арай куоракка кэлбитэ, барыта олус сонун, устудьуоннар бары бэйэ-бэйэлэрин кытта билсэн, бэйэлэрэ хампаанньа буолан сылдьаллар эбит, ол иһин оҕолору кытта сыһыан олохтуурга ыарырҕаппыт уонна кэтэхтэн үөрэххэ көһөргө сананан ийэтигэр эрийбит. Ону ийэтэ утарбакка: «Хата кэлэҥҥин дьоҥҥор хотон көрсүөҥ, үлэлиэҥ, илии-атах наада» – диэн этээччи буолбут. Ону истэн баран Ньургуйаана олох үрдүк үөрэҕи хайаан да бүтэриэхтээҕин өйдөөбүт. Ити курдук араас түгэннэргэ ийэтэ хаһан да утарбатын, оҕотун санаатын истэрин, сөптөөх суолу тутуһарыгар куруутун өйөбүл, тирэх буоларын эттэ. Устудьуоннарга быстах санааҕа оҕустарбакка, ыарахан кэмнэри туоруу үөрэнэргэ баҕа санаатын тиэртэ.
Киһи кинигэ аахтаҕына тыла-өһө сайдарын бэлиэтээтэ. Оҕо сылдьан саха норуодунай суруйааччыта Николай Гаврилович Золотарёв-Николай Якутскай «Сүтүк» романын умсугуйан туран аахпытын, билигин библиотекаҕа сылдьарын, саҥа ааптардар айымньыларын уларсан ааҕарын эттэ.
Кэлбит истээччилэрбит, ыалдьыттарбыт бары да культура, литература эйгэтигэр сыһыаннаах буолан ыйытык бөҕө биэрдилэр, саамай «НВК-ҕа үлэлиир «Сайдам саха сирэ» сериалга курдук интригалардаах дуо» – диэн кытта ыйыттылар. Ыччат дьон саха сериалларын сөбүлээн көрөллөрүн бэлиэтээтилэр.
Библиотека бэриниилээх аҕам саастаах ааҕааччылара тэрээһин кэннэ санааларын эттилэр.
М.Е. Степанова, педагогическай үлэ бэтэрээнэ, Норуот үөрэҕириитин туйгуна: «Биһиги түөлбэбитигэр баар Н.Д. Неустроев аатынан Дьокуускай куорат киин бибилитиэкэтигэр култуура, ускуустуба үлэһиттэрин кытта көрсүһүүлэри Маайа Беленкова утумнаахтык ыытар. Бу сырыыга НКИХ сарсыардааҥҥы «Саҥа күн» биэрии уонна «Тэтим» саха араадьыйатын ыытааччыта Ньургуйаана Ботуевалыын көрсүһүүбүт кэрэхсэбиллээхтик буолла. Биһириир ыытааччыбыт оҕо сааһын, идэтин хайдах саҕалаабытын, күөх экраҥҥа үлэлээһин уратытын киһи истэ олоруон курдук сэргэхтик кэпсээтэ. Бэйэтин идэтин баһылаабыт, үлэтин үгэнигэр сылдьар үтүө улуустан төрүттээх бэртээхэй ыытааччы кыыспытыгар инникитин үгүс ситиһиини, үгүс үөрүүнү баҕарабын».
Бэтэрээн учуутал З.К. Желобцова: «Бүгүн Н.Д. Неустроев аатынан Дьокуускай куорат киин библиотекатыгар Маайа Беленкова Саха телевидениетин күнүнэн күөх экран ыытааччыта Ньургуйаана Ботуеваны ыҥыран бэртээхэй көрсүһүүнү ыытта. Ньургуйаана сүрдээх истиҥ, дэлэгэй кэпсээннээх киһи эбит. Телевидение хас биирдии таһаарыыта үгүс элбэх киһи үлэтэ буоларын, хамаанда иллээх, түбүктээх, сиппит-хоппут үлэтэ дьон көрүүтүгэр тахсарын, коллегаларыгар махталлаахтык сыһыаннаһарын кэпсээн сэҥээртэ. Студеннар элбэх, интириэһинэй ыйытыыларыгар ситэри-хотору хоруйдаата. Бэйэтин үлэтигэр элбэхтик ааҕар, дьулуурдаах, бириэмэни кытаанахтык аттарынар эрэ киһи сатаан үлэлиирин кэпсээн, оҕолорго элбэх толкуйу биэрбит буолуохтаах. Олоҥхону сатаан истиини, Олоҥхо саха тылыгар суолтатын туһунан санаатын үллэһиннэ. Эдэр, олох киэҥ аартыгар үктэнэн, үлэһит буолан суол солонор оҕолорго көдьүүстээх сэһэргэһии буолла дии санаатым. Биир кэмҥэ бииргэ үөрэммит, билигин тахсыылаахтык үлэлии сылдьар, туһунан суоллаах-иистээх эдэр үлэһиттэртэн киһи үөрэр. Эдэрдэр маннык үлэлээн, ыччаттарга ыраас суолу арыйа сылдьыҥ. Маннык сонун көрсүһүүлэринэн, араас үтүө тэрээһиннэринэн сэргэхситэ сылдьаргытыгар махтал».
Дьэ ити курдук, бары астынан, дуоһуйа кэпсэтэн, араас тиэмэлэри ырытыһан, санаа атастаһан тарҕастыбыт. Кэлбит ыалдьыттарга махтал.
