Ыам ыйын 15 күнүгэр Кыраайы үөрэтэр бибилэтиэкэ, үгэскэ киллэрэн, «Сахалыы судургутук» диэн ааттаммыт бэрт сэргэх, көхтөөх уонна дириҥ ис хоһоонноох тыл оонньуутун ыытта.
Бу тэрээһин сүрүн сыала — эдэр көлүөнэҕэ төрөөбүт тыл күүһүн, кэрэтин тиэрдии уонна сахалыы толкуйдууру, этэри-тыынары сайыннарыы.
Оонньууга Дьокуускай куорат 2 №-дээх Национальнай политехническай орто оскуолатын 8-с кылааһын үөрэнээччилэрэ көхтөөхтүк кытыннылар.
Эдэр ыччат бэйэлэрин тылларын төһө билэллэрин, төһө сымсатык сахалыы толкуйдуулларын көрдөрөр сыалтан оонньуу 3 сүрүн түһүмэхтэн турда. Маҥнайгытынан — хамаанданы билиһиннэрии. Манна оҕолор бэйэлэрин хамаандаларын ааттарын, девизтэрин уонна уратыларын биир да кыбытык, сыыс тылы туттубакка, сахалыы тылынан олус табыллан, бэргэнник көмүскээтилэр. Иккиһинэн — тыл оонньуута. Бу түһүмэххэ кыттааччылар саха тылын баайын, тыллары төһө билэллэригэр күөн көрсүстүлэр. Түмүктүүр түһүмэххэ хамаандалар Саха сирин историятыгар, култууратыгар, төрөөбүт тылга уонна сиэргэ-туомҥа сыһыаннаах араас таабырыннаах, сытыы боппуруостарга хоруйдаан, бэйэлэрин билиилэрин таһымын өссө төгүл бигэргэттилэр.
Үөрэнээччилэр «Кэл. Көр. Иһит. Кэпсээ» диэн оонньуу ыҥырыытын толорон, төрөөбүт тыл сайдарын туһугар бэйэлэрин санааларын үллэһиннилэр, доҕотторун кытта бииргэ сайдар ураты эйгэни тэрийдилэр.
Тэрээһин үрдүк таһымнаахтык ааһарыгар уонна кыттааччылары бэртээхэй бириистэринэн үөрдэргэ көмөлөспүт спонсордарбытыгар: «Айар» национальнай кинигэ кыһатыгар, «Синема Центр» кинотеатрга уонна «Мост» мобильнай сыһыарыыга ис сүүрэхтэн махталбытын биллэрэбит!
Төрөөбүт тылбыт өрүү баай, күүстээх уонна эдэр көлүөнэ уоһуттан түспэт буоллун! Сахабыт дьоно-сэргэтэ, иитиллибит ийэ тылбытынан истиҥник-иһирэхтик иилэһэн, сахабыт сайдам саҥатынан сайаҕастык сайа тыынан, төрөөбүт төрүт тылбыт төлкөтүн түстүөҕүҥ, удьуору утумнаан уу сахалыы тыллаах буолуоҕуҥ диэн ыҥырабыт!
