Бары билэрбит курдук, олунньу ый 13 күнүгэр биһиги Өрөспүүбүлүкэбитигэр «Төрөөбүт тыл уонна сурук-бичик күнэ» бэлиэтэнэр.
Ол чэрчитинэн, бүгүҥҥү биһиги көрсүһүүбүт күндү ыалдьытынан буолла Саха Өрөспүүбүлүкэтин Суруйааччыларын Сойууһун чилиэнэ, Кэбээйи нэһилиэгин бочуоттаах олохтооҕо, «Уран тыл оһуора» литературнай түмсүү салайааччыта, «Сырдык сыдьаайа» суруйааччы оҕолор түмсүүлэрин салайааччыта, сахалыы саҥарар «Тэтим» араадьыйа общественнай кэриспэндиэнэ, үлэ бэтэрээнэ Раиса Николаевна Тимофеева-Михайлова – Сырдык Күүс.
Раиса Николаевна хоһоон хоһуйар, алгыс, ырыа тылларын айар дэгиттэр талааннаах киһи. Биэс сыл иһигэр 135 кинигэтэ бэчээттэнэн тахсыбыт. Ону таһынан Республиканскай таһымнаах айар куттаах оҕолорго хоһоон күрэҕин тэрийэн ыытар. Ол күрэх түмүгүнэн хоппут оҕолор хоһооннорун түмэн хомуурунньуктары таһаарар.
Бу көрсүһүүгэ Саха политехническай лицей 6 кылааһын үөрэнээччилэрэ ыалдьыттаатылар. Раиса Николаевна оҕолорго «Өлүөнэ очуостара» диэн Саха сирин кэрэ көстүүтүн көрдөрөр, үс омук тылынан: сахалыы, нууччалыы, английскайдыы хоһооннору бөрөрбүөттэтэн, улахан кинигэ оҥорон, Аан дойдуга тиийэ тарҕанар кинигэни оҥорон таһаарбытын туһунан кэпсээтэ. Биһиги библиотекабытыгар, үөрэнээччилэргэ бэйэтин кинигэлэрин бэлэх уунна.
Раиса Николаевнаҕа махталбытын тиэрдэбит. Айымньылаах үлэҕит сыаналана турдун, өссө да үрдук ситиһиилэри баҕарабыт!
Сахалыы таҥаспын кэтэммин,
Очуоһум үрдүгэр турабын,
Сарыал саҕахтан тахсарын
Утары туран көрсөбүн.
Илиилэрбин уунаммын,
Күнтэн күүс көрдөhөбүн,
Куппун күүhүрдэбин,
Күүс – сэниэ иҥэринэбин.
