«Дьүһүй» хуорум, ырыа куттаах, айар-тутар дьоннорум, биир дойдулаахтарым, ырыаны таптааччылар дорооболоруҥ!
От ыйын 4–5 күннэригэр Кэбээйигэ ОЛОҤХО ЫҺЫАҔА – 2026 буолар. Онно 4-кэ 17 ч. «КЭБЭЭЙИБИН ТУОЙАБЫН» диэн ааттаах мин айар ТҮҺҮЛГЭМ — концерым буолар. Онно 23 ырыам ылланар.
Бу күннэргэ 3 түһүмэхтээх «КЭБЭЭЙИБИН ТУОЙАБЫН» диэн ырыаларбынан попуррилары билиһиннэрии курдук кылгас гына айар үлэм 50 сылыгар анаан таһаардым.
Попуррилары 34 Кэбээйигэ аналлаах-сыһыаннаах, ол иһигэр 27 Кэбээйи туһунан, онтон төрүттээх, уонна биллэр-көстөр суруйар ааптардар тылларыгар ырыаларбыттан түмэн-таҥан оҥордум.
Кэбээйибэр, төрөөбүт дойдубар, дьоммор-сэргэбэр тапталым, махталым, киэн туттуум муҥура суох, уонна бэйэм отчуотум-сыһыаным буолар, ону истиҥ-сэргээҥ, ыллааҥ-ыллаһыҥ, билиҥ-көрүҥ, ырытыҥ-сыаналааҥ, таптааҥ-тарҕатыҥ диэн ыҥырабын, көрдөһөбүн...
Бу ырыабын Сайа тылыгар 1995 с. «Төннө туруом Түбэйбэр» диэн хоһоонугар Медцентрга операция кэннэ сытан суруйбутум. Онно Сайа «Тыллыы» диэн 1994 с. тахсыбыт хомуурунньугуттан элбэх лирика хоһоонугар ырыалары суруйбутум. Сайаны Сунтаартан булан кэпсэтэн ырыабытын «Төннө туруом дойдубар» диэн ааттыахха диэн кэпсэтии сөбүлэҥ буолбута.
1996 с. Национальнай библиотекаҕа «Сайа лирикатыгар ырыаларым» диэн биэчэр-көрсүһүү оҥорбутум. Ол саҕана Гаврил Николаев музыкальнай училищеҕа вокалга үөрэнэр этэ. Мин онно аккомпаниатор-баянистарга учууталлаабытым. Гаврил уопсайа 5 биэс ырыабын ыллаабыта. Итинник историялаах ырыа.
Алексей Калининскай-Луҥха
