Үйэлээх айымньы – үйэлээх испэктээк[16+]

Байанай ыйын 3 күнүгэр Кыраайы үөрэтэр В.Г.Белинскэй аатынан бибилэтиэкэҕэ Саха тыйаатырын кытта «Үйэлээх айымньы – үйэлээх испэктээк» бырайыак чэрчитинэн «Наара Суох — Саха тыйаатырын үйэлээх испэктээгэ» көрсүһүү буолла. Бырайыак ааптардара бибилэтиэкэр Екатерина Попова, театровед Надежда Осипова.

Бу бырайыак иккис тэрээһинэ саха норуотун суруйааччыта Иван Гоголев-Кындыл устудьуоннуу сылдьан суруйбут «Наара суох» улуу айымньытыгар уонна бу айымньыга олоҕуран, сүдү режиссер Федот Потапов Саха тыйаатырын сыанатыгар 1965 сыллаахха туруорбут испэктээгэр, кини умнуллубат дьоруойдарыгар ананна. Ыалдьыттар суруйааччы бу айымньыны хайдах суруйбутун, норуот номоҕор сылдьар Наара Суох уобараһын хайдах уус-уран литератураҕа таһаарбытын, айымньы хайдах үрдүк трибунаттан «сүллүгэстэммитин» кытта билистилэр. Тэрээһин саамай күндү уонна долгутуулаах түгэнинэн «Наара Суох» испэктээккэ оонньуур Саха тыйаатырын артыыстара Зоя Багынанова, Иннокентий Луковцев, Елизавета Потапова, Айаал Аммосов кыттыыны ылбыттара буолла. Кинилэр бэйэлэрин уобарастарын хайдах арыйалларын, Саха сыанатыгар бу айымньы хайдах уһун үйэлэммит кистэлэҥин туһунан кэпсээтилэр, сыанаҕа оонньообут умнуллубат түгэннэрин күлүүлээх-оонньуулаах гына сырдаттылар. Көрөөччүлэри кытта «Наара Суох өс хоһоонноро» диэн мындыр өйү уонна тыл байҕалын тардар кылгас сытыы оонньуу ыытылынна, кыайыылаах Елена Прокопьева артыыстар уонна бибилэтиэкэ анал бириистэрин тутта. Тапталлаах, тылбыт сүппэтин туһугар туруулаһар артыыстарбытыгар махтал тыл мааныта, үтүөтэ ананна, сахабыт тылын кэрэтэ өссө төгүл күөрэччи тутулунна. Тэрээһин түмүгүнэн мустубут дьон биир санааҕа кэллибит: Кындыл «Наара Суоҕа» — бу судургу күлүү эрэ буолбакка, саха киһитин өйүн-санаатын, сытыы өйүн, олох ыарахаттарын мындыр буолуунан кыайар улуу күүһүн көрдөрөр,сорохтору «ытыалыыр» өлбөт тыыннаах айымньы буолар. Бибилэтиэкэҕэ кэлбит кэлбит, иһирэх санааларын үллэстибит Сахабыт тыйаатырын артыыстарыгар, хас биирдии ытык ыалдьыкка уонна барҕа махталбытын тиэрдэбит!