Ыам ыйын 19 күнүгэр «Книга 03» библиотекаҕа «Ыра санаа кынатынан» диэн ураты тэрээһин буолан ааста. Саха көрөөччүтүн кутун туппут саха норуодунай артыыһа Зоя Багынанова библиотека ааҕааччыларын кытта көрүстэ. Бу күн кини талааныгар сүгүрүйэр дьон саалаҕа толору муһуннулар.
Зоя Петровна бэйэтин тус олоҕун уонна айар үлэтин ытыска уурбуттуу аһаҕастык үллэстиннэ. Кини самныбат модун санаатын, айар үлэ үрдүк өрөгөйүн, уустук дьылҕатын туһунан кэпсээтэ. Зоя Петровнаҕа дьон бэйэлэрин ыйытыыларын биэрдилэр, биир дойдулаахтара кэлэн истиҥ-иһирэх тыллары эттилэр, доруобуйаны, туох баар үтүөнү баҕардылар.
Көрсүһүү түмүгэр, Анна Ахматова «Реквием» поэматын сахалыы тылбааһын ааҕан иһитиннэрдэ. Мустубут дьон сүрдээх умсугуйан олорон иһиттилэр уонна ааҕан бүтээтин кытта ытыс тыаһын бэлэхтээтилэр.
Библиотека ааҕар саалатыгар Зоя Багынанова олоҕун, айар үлэтин кэрэһэлиир хаартыскалардаах уонна кинигэлэрдээх быыстапка турбута ааҕааччы сэҥээриитин ылла.
Зоя Петровна курдук холку, муударай, сахалыы куттаах-тыыннаах, уһулуччу үрдүк таһымнаах артыыһы кытта көрсүһүүттэн дьон астынан, дуоһуйан бардылар.
