Төрөөбүт төрүт тыл
Сөрүүн сүөгэй курдук...
А.Иванов -Күндэ
Олунньу 9 күнүгэр Тулагы-Киллэм нэһилиэгэр, үгэскэ кубулуйбут үһүс төгүлүн ыытыллар «Нэһилиэк сахалыы дьыктаана» төрөөбүт төрүт тыл, сурук – бичик күнүгэр, Саха суругунан литературатын 125-сылыгар, Афанасий Яковлевич Уваровскай төрөөбүтэ 225 сааһыгар анаан М.П. Обутова – Эверстова аатынан култуурабыт киинигэр биир суолталаах тэрээһин, төрөөбүт төрүт тылбыт декадатын аһыллыытыгар буолла.
Үөрүүлээх күн өбүгэбит үтүө үгэстэрин үйэтитэн, култуурабыт үлэһиттэрэ ыалдьыттары алгыстаах алаадьынан, сахалыы сиэринэн- туомунан көрүстүлэр. Тэрээһини начаалынай кылаас учуутала Июлия Максимовна Григорьева «Тапталлаах Тулагым» хоһоонунан арыйда. Аан тылы Тулагы-Киллэм аҕа баһылыга-Егор Гаврильевич Попов үөһэ этиллибит тылларга олоҕуран, Афанасий Яковлевич Уваровскай төрөөбүтэ 225 сылыгар болҕомто ууран, быйылгы үлэ былаана нэһилиэккэ саҕаламмытын биллэрдэ. Салгыы киирии тылы Дьокуускай куорат Дууматын дьокутаата-Яков Тимофеевич Оконешников сахалыы уус- уран тылынан эҕэрдэлээн дьону үөртэ. Салгыы «Дьокуускай куорат» куораттааҕы уокурук тыа сирин (10№ - дээх филиал) А.Я.Уваровскай аатынан библиотека сэбиэдиссэйэ Александра Васильевна Филиппова Тулагы-Киллэм нэһилиэгэ республиканскай «Сахалыы дьыктаан» акцияҕа хас сылтан кыттыыны ылбытын, «Нэһилиэк сахалыы дьыктаанын» Лонгина Пантелеймоновна Бережневалыын (Саха өрөспүүбүлүкэтин үтүөлээх үлэһитэ) хас сылтаан көҕүлээн ыыппыттарын сиһилии билиһиннэрдэ. Биир үөрүүлээх түгэнинэн Эдьигээн улууһун Афанасий Яковлевич Уваровскай аатынан краеведческай музей үлэһиттэрин аатыттан эҕэрдэ видеоролик көрдөрүүтэ буолла. 10 кылаас үөрэнээччитэ Артем Ларионов (сал. Изабелла Сидоровна Иванова, Варвара Дмитриевна Кузьмина) Афанасий Уваровскай туһунан чинчийиитин иһитиннэрдэ.
Быйылгы дьыктааны начаалынай кылаас учуутала Матрена Ивановна Кузьмина, Саха суругунан литературатын 125-сылыгар анаан, саха дьахталларыттан бастакы драматург, оҕо суруйааччыта, Нам улууһун бочуоттаах олохтооҕо Мария Петровна Обутова-Эверстова ахтыытыттан быһа тардыыны дорҕоонноохтук ааҕан суруйтарда. Дьыктааҥҥа барыта 43 киһи кыттан, кыайыылаахтарынан буоллулар: «Бастыҥ суруксут» – Евгения Степановна Васильева, «Билиилээх суруксут» – Татьяна Сергеевна Ли, «Кэрэ буочар» – Яков Тимофеевич Оконешников, «Кэскиллээх суруксут» –Кира Иванова, «Ытык суруксут» – Светлана Пантелеймоновна Шарина. Ити курдук тэрээһин бэрт сэргэхтик, Александра Николаевна Харитонова иилээн-саҕалаан ыытан, оһуохайынан түмүктэннэ.
Түмүккэ омук дьылҕата төрүт культурабытыттан, төрөөбүт төрүт тылбытыттан, сурукпутуттан-бичикпититтэн быһаччы тутулуктааҕын өйдөөн, өйөөн, күүс -көмө, тирэх буолар дьоннорбутугар Егор Гаврильевич Поповка, Яков Тимофеевич Оконешниковка, Наталья Афанасьевна Афанасьеваҕа, Максим Пантелеймонович Игнатьевка, Тулагытааҕы П.И.Кочнев аатынан оскуола учууталларыгар М.И.Кузьминаҕа, С.Т.Крылатоваҕа, И.М. Григорьеваҕа, Н.Д.Кузьминаҕа, А.С. Сидороваҕа, Т.Б. Колесоваҕа барҕа махталбытын этэбит.
